Breytingar á Prjónakaffi Heimilisiðnaðarfélagsins

Ný prjónakaffinefnd hefur tekið til starfa hjá Heimilisiðnaðarfélaginu og við bjóðum Önnu Sigríði Eyjólfsdóttur, Helgu Ólafsdóttur, Monicu Fidalgo og Ragnheiði Sigtryggsdóttur hjartanlega velkomnar!

Fyrsta prjónakaffi haustsins verður haldið fimmtudagskvöldið 4. september. Húsið opnar klukkan 19:00 en klukkan 20:00 hefst kynning Önnu Sigríðar Jónsdóttur á útsaumi í prjón. Anna Sigga sækir sinn innblástur í ömmu sína og nöfnu úr Skagafirði og nýtur þess að setja æskuna niður í spor eða lykkju. Ef til vill munu gestir kvöldsins fá innblástur að nýjum og spennandi verkefnum þar sem útsaumur og prjón sameinast!

Prjónakaffi Heimilisiðnaðarfélagsins verður nú með breyttu sniði. Við verðum áfram með spennandi kynningar á prjóni og öðru handverki, en munum aðeins bjóða upp á kaffi, gos og súkkulaði á sanngjörnu verði. Prjónakaffið í september og desember verður í sal Heimilisiðnaðarfélagsins að Nethyl 2e, en við munum auglýsa skemmtilega vettvangsferð síðar í haust þar sem prjónakaffið ætlar að skella sér í heimsókn. 

Mikil aukning hefur orðið á námskeiðahaldi hjá Heimilisiðnaðarfélaginu síðustu misseri og öll kvöld vikunnar fullbókuð. Við þurfum því að hugsa út fyrir rammann (eða út fyrir salinn!) í vetur. Við vonum að prjónakaffi-gestir Heimilisiðnaðarfélagsins taki vel í þessar breytingar og hvetjum ykkur til að fylgjast vel með dagskránni í vetur, því fyrirhugað er að fara í vettvangsferðir í stað þess að hittast í Nethylnum!

Við hlökkum til að sjá ykkur sem flest í vetur, með eitthvað skemmtilegt á prjónunum!